Simplemente mi tin otro talento for di bo!

11th Nov, 2020

Un di e kosnan ku e alumnonan di e klas di talento mester hasi tur siman, ta pone tur mesa i stul kla pa nan lès i despues warda nan na final di lès. For di komienso e alumnonan ta laga mira ku gustosamente nan ke karga responsabilidat. Den tempu korto sin masha guia tur kos ta kla butá. Regularmente nan ta sorprendé mi i mi ta duna nan kòmplimènt pa esei tambe. Awe a lanta un komoshon ora di warda e mesanan i mi a bai wak kiko ta pasando. Un alumno ta grita: “Laga mi hasié numa, bo no por nada tampoko!” E otro alumno ta kontestá mashá trankil: “No ta bèrdat ku mi no por nada; simplemente mi tin otro talento for di bo!”

Kon abo lo reakshoná den un situashon asina? Probablemente mayoria di e alumnonan lo a rabia òf lo a sinti nan en todo kaso rechasá. I si mi ta sinsero; mi no sa si mi tabata kapas di por a reakshoná asina. Hopi bia mi ta kompará mi mes ku otro tambe i ta wak mas tantu kiko mi no por na lugá di loke si mi ta bon aden.

Ta hopi fásil korehí un otro alumno. Pasobra ta bon di dje pa bisa ku e otro no por nada?

Pero, i si su komportashon ta bini di un talento ku e tin?

E promé alumno ta laga mira enfoke riba resultado. E ta dirigí riba e meta, esta warda tur kos mas lihé posíbel. E di dos alumno ta kapas di wak e proseso di siña i e tin mas pasenshi. Si el a haña espasio serka e otro alumno pa e mes deskubrí kon mester a sera e mesa, despues di purba algun bia e lo a logra sigur i siguiente bia lo a bai talbes mas lihé tambe. Si di otro banda e promé alumno tabata mas konsiente ku den un sierto situashon tin diferente manera (talento) pa aserká kosnan, kisas e por tabatin mas pasenshi. Hopi bia nos no ta duna otro espasio, pasobra nos no ta komprondé bon ainda kiko ta nos talentonan i kon nan ta konektá ku otronan. Hopi bia nos no ta tribi di laga mira kiko nos talentonan ta i kiko nos por pa kualke rason algun.

Bo ta mira pues ku si bo wak e situashon aki di aserka, ambos alumno tin talentonan úniko pero diferente i niun di dos ta malu òf bon. Ambos ta pèrmití. Pero kon nos ta anda ku e diferensianan aki? Den e siguiente simannan nos ta bai sigui traha na nan. Huntu nos ta bai deskubrí kon bo por atendé mihó ku esaki.

Si nos siña konosé nos talentonan mihó i tambe siña rekonosé di otro, e ora ei nos por komplementá otro i siña di otro. Den e klas di talento nos ke ofresé e alumnonan un ambiente kaminda nan por sinti nan sigur di ta e persona ku nan ta. Solamente e ora ei talento por bini ariba i por haña oportunidat pa desaroyá. Esaki nos ke pa tur hende! Pasobra “simplemente tur hende tin otro talento”!