Aktividatnan

Boneiru tin mester di personalidatnan habrí, polifasétiko i fuerte ku ta usa nan talentonan pa progreso di Boneiru den su totalidat. For di e perspektiva fasinante aki Mangazina di Rei ta reta spesialmente mucha, hóben, gruponan ménos privelegiá i empresarionan (bou di kua, tambe kunukeronan) pa desaroyá un bista amplio riba komunidat. For di kultura boneriano (manera di biba) nan ta bira entusiasmá pa patrimonio, muzik, agrikultura, emprendimentu, rekreashon i turismo.

“Tur hende, grandi i chikí, tin talento! Na Mangazina di Rei bo ta haña bo lugá sigur i ruta pa un futuro sólido, inspirashon i konekshon”CEO TMA international

Photo credit: R. Wout

Talento Kultural

Talento kultural ta un programa pa mucha i hóben ku ta interesá den kultura di Boneiru. Nan ta haña lès di diferente hende di edat i profeshonalnan ku ta traha den sektor di kultura.

E muchanan ta haña lès di muzik i di kanto. Kada mucha ta skohe un instrumènt krioyo òf baile. Huntu nan ta praktiká ku kantikanan ku ta kuadra ku e tema kultural. E kuater temanan anual ta: Simadan,San Juan i San Pedro, Músika folkloriko i Pone Barí Ronka. Na final di un tema e muchanan ta presentá durante di ‘Nos Zjilea’. Di e manera aki e estilo típiko ‘krioyo’ di toka muzik boneriano ta pasa pa e hóbennan i di e manera aki protehá esaki pa e no bai pèrdí

Banda di siña toka un instrumènt krioyo òf baile típiko boneriano, e muchanan ta siña otro abilidat tambe manera; presentá nan mes, traha huntu i disiplina. Nan ta sinti nan mes orguyoso di nan prestashon i ku esaki nan ta traha na nan balor propio i konfiansa propio. Partisipando na e programa aki e muchanan ta deskubrí nan talentonan i nan ta haña e oportunidat pa usa esaki durante di e programa i e presentashonnan.

Bo tambe ke registrá pa
Talento Kultural? Donashon

“For di chikí mi tabata sa ku mi tin talento musikal i na Mangazina di Rei mi por a sigui desaroyá esaki. Aparte di esei mi a siña hopi otro kos tambe manera; traha huntu, tuma desishon, rèspèt pa grandinan i disiplina. Mi tabatin e oportunidat tambe di partisipá na un proyekto di filmashon durante di mi temporada na Mangazina di Rei. Pa e motibu aki mi a haña hopi gana di bai sigui un estudio pa bira aktor òf direktor di esena. Si tur kos ta bon otro aña mi ta kuminsá ku mi estudio!”Rogen Pineda Mateo
Partisipante na Talento Kultural

“Hopi bon trabou. Sigui asina di manera ku nos muchanan por sigui desaroyá nan talentonan, pasobra ta nan ta futuro di Boneiru.”Mayor di partisipante na Talento Kultural

Photo credit: J. Morgan - Bon Reporter

Photo credit: R. Wout

Nos Zjilea

Kada último djasabra di luna Mangazina di Rei ta organisá e evenementu kultural-edukativo bou di e nòmber Nos Zjilea. Durante di ‘Nos Zjilea’ hende lokal i turista por topa otro i disfrutá di kultura boneriano. Talento Kultural ta haña oportunidat pa presentá i pa laga e públiko mira kuantu kos nan por kaba. Hopi bia otro bandanan boneriano konosí manera “Tutti Frutti” ta sostené nan.

Photo credit: J.Morgan - Bon Reporter

Orkesta pa mucha

Resientemente Mangazina di Rei a asosiá ku ‘Stichting Leerorkest’ for di Hulanda. Pa medio di e metódika konosí di e proyekto úniko aki e muchanan ta siña den tempu korto toka un instrumènt di orkesta i huntu ku nan dosentenan presentá den un orkesta sinfóniko. E promé orkesta pa mucha a kuminsá na Kolegio San Luis Bertran na Rincon. Pa mas informashon por subi e wèpsait www.leerorkestbonaire.org

Bo tambe ke partisipá na Orkesta pa mucha ku bo klas? Donashon

Photo credit: H. Christiaan-Quartel, Fundashon Mangazina di Rei

Programanan edukativo pa skolnan

Mangazina di Rei ta ofresé skolnan programanan edukativo. Den e programanan aki nos ta laga e muchanna di skol sera konosí ku diferente aspekto di kultura. Nan ta haña un rekorido den nos eksposishon, un tayer di muzik òf nan ta traha na mes “repa”. Nan ta haña un tarea pa elaborá di manera ku e konosementu atkerí ta keda mas presente.

Nan ta eksperensiá nos programanan edukativo pa skol komo bon organisá, ku por siña hopi for di dje, útil i dirigí riba e mucha. E dosentenan ta haña ku nan alumnonan ta partisipá ku gana i ku e programa ta konektá na mundu di eksperensia i konosementu di nan alumnonan.

Bo tambe ke partisipá na un programa edukativo di Mangazina di Rei ku bo klas? Donashon

“E diferente tayernan di máksimo 10 minüt ta nèt bon pa e muchanan. Asina nan ta keda ku bon konsentrashon i enbolbí ku e tema. Tambe di un manera hopi interaktivo duná.”Maestro na Kolegio Kristu Bon Wardador

“E programa edukativo tabata hopi variá ku diferente aktividat di skucha, toka i weganan di moveshon.”Maestro di Kolegio Rayo di Solo

Photo credit: H. Christiaan-Quartel, Fundashon Mangazina di Rei

Klas di talento

Klas di talento ta un trayekto di formashon i eksperensia di trabou spesial pa tiner. Durante di un búskeda interesante nan ta deskubrí pa medio di diferente tarea den e parke kultural unda nan talentonan ta i kon nan por sigui usa i desaroyá e talentonan aki. Pa medio di esaki nan ta haña mihó bista den nan propio posibilidatnan i ku esei nan lo por para mas fuerte den nan sapatu pa por hasi eskohonan pa un futuro eksitoso. Pasobra: usa bo talento ta hasi bo kontentu!

Den koperashon ku Stichting Jongeren en Toekomst Bonaire nos ta ofresé e programa aki na alumnonan di akohida despues di skol

Bo tambe ke registrá bo grupo pa e klas di talento? Donashon

Photo credit: H. Christiaan-Quartel, Fundashon Mangazina di Rei

Trayektonan di siña i traha

Mangazina di Rei ta ofresé alumno, studiante i gruponan ménos priveligia e oportunidat di atkerí konosementu i eksperensia den un ambiente di trabou profeshonal. Bou di guia di entrenadónan e alumnonan por deskubrí kon ta manehá e Parke Kultural Mangazina di Rei i kua talentonan mester pa esaki. Pa deskubrí nan propio talentonan i desaroyá e kompetensianan nesesario i abilidatnan laboral, nan ta sigui kurso, entrenamentu i nan ta praktiká na e diferente departamentunan den e parke kultural.

Mangazina di Rei tin hopi eksperensia ku formashon na lugá di trabou (werkplekopleiden) pa diferente grupo di enfoke.

Donashon

“Aki na Mangazina di Rei mi a desaroyá mi talento pa traha ku hende grandi. Mi a pensa semper ku mi lo no por traha den sektor di kuido, pasobra mi mes ta den ròlstul. P’esei mi a purba solisitá pa un trabou di atministrashon. Durante di mi trayekto di siña i traha na Mangazina di Rei mi a haña e oportunidat pa realisá un tarea pa un grupo di hende grandi. I despues mi a haña un lugá pa kore stazje na e instituto di kuido kaminda e grandinan aki ta keda i despues nan a ofresé mi un funshon. Mi ta mashá kontentu pasobra aki mi por usa mi talentonan tur dia!” Gemar Bernabela
Partisipante na e trayekto di siña i traha

Photo credit: H. Christiaan-Quartel, Fundashon Mangazina di Rei

Kunuku Lifestyle Challenge

Mangazina di Rei a desaroyá un konsepto di lès, ku nos a yama “Kunuku Lifestyle Challenge”. “Kunuku Lifestyle Challenge” ta un proyekto pa mucha i hóben di 6 te 14 aña. Boneiru konosé un historia di kunuku sólido, esei ta nifiká ku ántes (100 te 50 aña pasá) hopi hende tabata kultivá nan propio bèrdura i fruta i tabatin krio di bestia riba nan propio pida tereno (kunuku). Lástimamente ku den e generashon aktual esaki no ta bin asina hopi dilanti mas. Ku e programa edukativo aki Mangazina di Rei ke trese e muchanan mas serka di e historia di “kunuku” aki.

Na e momentu aki no ta ofresiendo e programa.

Photo credit: H. Christiaan-Quartel, Fundashon Mangazina di Rei

Oportunidat pa kore stazje

Mangazina di Rei ta rekonosé pa ROA CN (Raad Onderwijs Arbeidsmarkt) komo un kompania di instrukshon (leerbedrijf) i ta ofresé studiantenan di estudionan riba nivel di MBO i HBO na Boneiru i for di Hulanda oportunidat pa kore stazje. Komo kompania di instrukshon nos ta guia alumnonan na un manera responsabel durante di nan stazje práktiko i nos ta yuda nan ku desaroyo di kompetensia.

Nos ta ofresé diferente lugá di stazje den entre otro e siguiente funshonnan: guia turístiko, animadó musikal, kolaboradó edukativo, trahadó riba grupo, resepshonista, kolaboradó di horeca, kolaboradó di benta, organisadó di evenementu,merkadeo, maneho bèrdè (groenbeheer) i mantenshon. Di e manera aki nos ta trese ekspertisio aden i e studiantenan tin un lugá kaminda nan por haña eksperensia i por praktiká ku loke nan a siña na skol.

Ehèmpelnan di stazje

Skirbi plan di negoshi – studiante di Siensia empresarial (bedrijfskunde)
Traha material edukativo – studiante di Formashon kultural sosial (CMV)
Traha material di lès tokante patrimonio – studiante di Patrimonio
Traha skema pa evenementu kultural - studiante di Organisashon di evenementu
Diseñá ‘App’ pa e parke - studiante di Geo, Media i Diseño
Diseñá espasio pafó di Mangazina di Rei – studiante di Diseño di paisahe
Traha un módulo di familiarisashon (inwerkmodule) - studiante di Siensia edukativo (Opleidingskunde)
Desaroyá instrumentonan pa trayekto di siña i traha - studiante di SPH
Realisá investigashon tokante intenshon di bishita na parke – studiante di Matemátika apliká

Bo ke kore stazje na Mangazina di Rei?

“Na Mangazina di Rei tin un esfera di trabou dushi. Un tim ku sa kon traha huntu i tin plannan tremendo pa futuro. Pasobra tur trahadó ta embolbí den e plannan i desishonnan, nan ta traha ku kurason i alma pa e parke kultural. Tambe tabata agradabel traha ku e gruponan ménos previligiá. I pa mira kon kada persona riba su nivel por logra algu i por duna su kontribushon na komunidat.” Mariangela Oleana
Studiante di 4 aña di Ekonomia empresarial na Hogeschool
Rotterdam – aprel-sèp 2013

“Mi tin mashá apresio pa e gerensia di Mangazina di Rei. Apesar di limitashonnan ku Boneiru tin di aber kuné nan ta duna shentisinkuenta porshento di nan mes pa hiba e Parke Kultural Mangazina di Rei na un siguiente nivel. Perseveransia, determinashon, kreatividat i partikularmente e plaser ku kua nan ta purba logra e meta aki a kondusí ku mi a haña mashá atmirashon pa e proyekto aki. Ademas nan a sa di inspirá mi i entusiasmá mi pa alkansá metanan i pa realisá soñonan.”Luc van Rossum
Studiante di aña 3 di Diseño di paisahe na Hogere Agrarische School Den Bosch
Hulanda – yanüari-aprel 2014

“Komo studiante hulandes mi por a mira kon ta traha den un kultura diferente. Mi tabatin hopi espasio pa hasi mi propio investigashon i pa desaroyá un programa edukativo. Representante di Reino a invitá tur alumno di grupo 8 pa bishitá e eksposishon di Mangazina di Rei. Mester a diseñá un programa i e tarea aki, den koperashon ku mi guia di stazje mi a tum’é riba mi. Nos a risibí mas ku 200 alumno i nan reakshon tabata hopi entusiasmá. Mi ke gradisí tur mi koleganan di Mangazina di Rei pa e guia risibí durante di mi stazje.”Marieke van der Eerden
Studiante di aña 3 di Formashon Kultural Sosial na Hogeschool van Arnhem en Nijmegen
febrüari-yüli 2016

Photo credit: H. Christiaan-Quartel, Fundashon Mangazina di Rei

Boluntarionan

Boluntarionan ku ta yuda nos ku aktividatnan, promoshon i duna e muchanan i hóbennan lès. Nos ta okupá ku formulashon di un maneho atraktivo pa boluntario ku manual di instrukshon i entrenamentu korespondiente.

Bo tambe ke duna un man komo boluntario?

Photo credit: H. Christiaan-Quartel, Fundashon Mangazina di Rei

Hende di edat

Semper Mangazina di Rei ta buska koperashon ku hendenan di edat ku ke trese nan konosementu i eksperensia dilanti. E grandinan no ke solamente konta tokante ántes di manera ku e tesoro di informashon aki ta keda protegá pa e no bai pèrdí, tambe e ta hopi útil pa siguiente generashonnan, pasobra hopi sabidoria históriko ta basá riba un manera mashá respetuoso di anda ku otro i ku naturalesa.

Bo tambe ke kompartí bo konosementu ku e generashonnan mas hóben?