E brel di Talento

9th Oct, 2020

Purba wak un produkto, espasio òf persona for di un brel di talento!

Kua talento tin tras di un sala bunita mueblá òf e bon kantika na radio? Ki talento tin tras di un dushi bolo òf un eiskrim serka un trahadó di eiskrim?

Regularmente durante di e klas di talento serka nos na e parke kultural e alumnonan ta bisti e brel di talento literalmente pa siña pensa den talento. Asina nan a bai den e espasio di eksposishon ku nan brel di talento bistí ku un tarea pa saka 3 potrèt di talentonan ku a hala nan atenshon.

E promé talento ku a hala nan atenshon tabata e guia ku a papia ku nan na 4 idioma diferente; bon tardi, bon biní den nos museo”; “goedemiddag, welkom in ons museum”; “good afternoon, welcome in our museum”; “buenas tardes, bienvenido en nuestro museo”. Despues kada grupo a sigui kana i a saka diferente potrèt. Durante di evaluashon nos a laga otro mira e potrètnan i un bes nos por a tuma nota ku kada grupo a mira kosnan diferente. Por ehèmpel un bunita kuadro pintá pa un mucha muhé hóben di Rincon (talento pa pinta), un sombré di flèktu (talento kreativo), un mener ku ta toka kitara (talento musikal) i un boto di piskadó (talento di karpinteria).

Kon bo ta yega na bo talentonan? I; kiko ta talento eksaktamente? I kon bin ku nos kada un ta mira mundu asina diferente? Talento ta algu ku bo ta bon aden i ku bo tin hopi plaser den dje. Bo no mester hasi esfuerso i bo ta saka hopi energia i satisfakshon for di dje. Pa bo esei ta mashá normal. Tin talento bo a heredá for di bo famia i otro talento ta úniko di bo mes. Un regalo di Dios. Ta un arte pa deskubrí bo talentonan. E brel di talento ta yuda bo ke esei. Si bo siña wak for di e brel di talento bo ta komprondé mundu hopi mas mihó – e ora ei bo ta komprondé bo mes diripiente hopi mas mihó – i e otro tambe. Diripiente e otro ta interesante na lugá di straño.

Mi mes a krese komo mucha muhé chikí den un pueblo chikí kaminda tur hende konosé otro. Ounke mi tabata haña dushi na e finka di mi wela i welo i den e hòfi di mi mayornan ku semper nan tabatin na kas, mi tabata sa for di chikí ku un dia lo mi span mi alanan i lo no keda biba ei. For di chikí tabatin algu aventurero den mi; mi anhelo pa siña konosé otro parti di mundu i nifiká algu pa e hendenan ei.

Mi no tabata sa ku ta un talento e ta ku ta pertenesé na mi i ku mi tata tambe tabatin mes talento; komo un mucha hòmber di apénas 18 aña ya el a bai skol di nabegashon i ku durante di su promé añanan di karera el a nabegá bai diferente pais lehano riba un lina internashonal.

P’esei den e klas di talento ta importante pa e alumnonan bisti e brel di talento ku regularidat di manera ku nan ta bira konsiente di tur talento rondó di nan. Finalmente esaki lo yuda nan pa bai rekonosé nan propio talentonan. Si bo sa kiko ta bo talentonan, bo por buska mas fásil kiko bo aporte na mundu lo bai bira i kiko ta hasi bo felis.

“Your talent is God’s gift to you. What you do with it is your gift back to God”
Leo Buscaglia